Um nokkurra ára skeið hefur ýmsum upplýsingum um sveitarfélögin verið safnað kerfisbundið inn í gagnagrunn sem ber heitið Upplýsingaveita sveitarfélaga. Verkefnið hefur verið unnið í samvinnu Sambands íslenskra sveitarfélaga, Hagstofu Íslands og Félagsmálaráðuneytisins (Samgönguráðuneytisins frá síðustu áramótum). KPMG hefur verið faglegur ráðgjafi á ýmsum sviðum í tengslum við þetta verkefni. Þær upplýsingar sem er að finna í gagnagrunninum koma fyrst og fremst úr ársreikningum sveitarfélaga eða frá Hagstofu Íslands sem hefur safnað þeim frá sveitarfélögunum. Markmið verkefnisins er að hafa sem mestar upplýsingar sem varða sveitarfélögin tiltækar á einum stað og aðgengilegar fyrir alla þá sem áhuga hafa.
Fyrstu árin hefur aðgengi að gagnagrunninum verið bundið við þær stofnanir sem að verkefninu hafa staðið gegnum svokallað Cognos kerfi. Á síðasta ári var samið við Hagstofu Íslands um notkun á kerfi því sem hagstofan notar til birta þær upplýsingar sem stofnunin safnar saman á vefsíðu sinni. Það gerir mögulegt að opna aðgengi allra að gagnagrunninum gegnum netið á ódýran og einfaldan hátt.
Í gagnagrunninum er nú að finna upplýsingar um eftirfarandi efnisatriði:
- Ársreikninga sveitarfélaga, sundurliðaðir á málaflokka
- Útsvar og fasteignaskatt
- Grunnskóla
- Leikskóla
- Greiðslur úr Jöfnunarsjóði sveitarfélaga
- Íbúafjölda sveitarfélaga
- Flatarmál sveitarfélaga
Upplýsingum verður bætt í gagnagrunninn jafnóðum og mögulegt er þannig að í honum verði á hverjum tíma að finna víðtækar upplýsingar um rekstur sveitarfélaga og margháttuð önnur atriði sem tengjast sveitarstjórnarstiginu á Íslandi.
Bein slóð á upplýsingaveituna er http://upplysingaveita.samband.is/
Upplýsingar þessar eru fengnar af vef Sambands íslenskra sveitarfélaga www.samband.is