15. maí 2009

Arðgreiðslur Orkuveitu Reykjavíkur

Eftirfarandi bréf var ritað til starfsmanna Orkuveitu Reykjavíkur og er birt hér með leyfi Hjörleifs Kvaran, forstjóra Orkuveitu Reykjavíkur:

,,Ég skrifa þér þennan póst í tilefni fréttatilkynningar, sem trúnaðarmenn nokkurra stéttarfélaga starfsmanna sendu fjölmiðlum í dag. Leiðin á minn fund er greið og oft hafa starfsmenn komið að máli við mig af minna tilefni.

Til að byrja með vil ég þakka þér og öðru starfsfólki það, að mikill fjöldi ákaflega skapandi hugmynda hefur komið fram í sparnaðarátakinu, sem nú stendur yfir. Nú er verið að vinna úr hugmyndunum og eiga allir starfsmenn að geta séð hver afdrif hugmyndanna hafa orðið.

Eins og þú manst ef til vill frá starfsmannafundinum fyrir rúmum mánuði, þá herðir verulega að í rekstri Orkuveitunnar. Við verðum að skera niður útgjöld, launaútgjöld þar á meðal. Við ákváðum að fara þá leið í þeim efnum að leitast að fremsta megni við að standa vörð um störfin í fyrirtækinu. Þess vegna taka allir starfsmenn með meira en 300 þúsund krónur á mánuði á sig launalækkun og því meiri lækkun, því hærri sem launin eru. Þannig leggjumst við öll á árarnar. Hin leiðin er vissulega til, að fækka fólki, en mér fannst vera víðtæk sátt um það meðal starfsfólks að fara ekki þá leiðina. Sömu leið eru eigendur okkar að leitast við að fara; lækka laun frekar en að segja upp fólki.

Þá að arðgreiðslum. Arðgreiðslur til eigenda Orkuveitu Reykjavíkur eru með nokkuð öðrum hætti en gengur og gerist. Þær hafa verið föst fjárhæð en ekki hlutfall af hagnaði. Sveitarfélögin hafa þess vegna ekki verið að taka til sín mikinn hagnað í góðærinu, heldur skilið féð eftir í höndum okkar til að byggja fyrirtækið frekar upp. Þau hafa heldur ekki gert miklar kröfur um arðsemi þess fjár, sem þau eiga í Orkuveitunni. Frekar hafa þau haldið verði á vörum okkar og þjónustu eins lágu og mögulegt er og látið viðskiptavini þannig njóta aukinnar hagkvæmni.

 Þegar við vorum að vinna að gerð fjárhagsáætlunar, eftir hrunið í haust, var ljóst að afkoma fyrirtækisins 2008 yrði slæm og mjög erfitt ár framundan. Þá voru fyrstu aðhaldsaðgerðirnar ákveðnar og þeirra á meðal var að lækka arðgreiðslur um helming, úr 1.600 milljónum í 800 milljónir. Það var tekjuskerðingin sem sveitarfélögin þrjú tóku á sig, 50 prósent lækkun. Nú eru þau að berjast við að halda uppi þjónustu, sem frekast er unnt, á sama tíma og reynt er að halda álögum á íbúa í skefjum. Þau eru ekki öfundsverð af því verkefni að fá nú hundruðum milljóna króna lægri fjárhæð til að reka leikskólana, grunnskólana og félagsþjónustuna, sem nú mæðir mikið á.

Í því ástandi, sem enn ríkir, er ákaflega mikilvægt að allir standi saman, eigendur Orkuveitu Reykjavíkur, stjórn fyrirtækisins og starfsfólk. Allir hafa lagt sitt af mörkum til þess að mæta aðsteðjandi erfiðleikum og öll berum við þá von í brjósti að leiðin framundan liggi upp á við.

Kær kveðja,

Hjörleifur B. Kvaran
Forstjóri"

6. maí 2009

Fáein orð um framkvæmdirnar í Garðalundi

"Í síðustu viku birtust fréttir þess efnis að búið væri að slá á frest frekari uppbyggingu í Garðalundi vegna verkefnisins „Viskubrunnur í Álfalundi“ sem verið hefur til umræðu innan bæjarkerfisins frá því í fyrrahaust.  Rétt er að taka fram að hér var full fast að orði kveðið enda hafa bæjaryfirvöld ekki tekið ákvörðun um frekari framgang verkefnisins vegna efnahagsástandsins.  Næstu skref í málinu eru nú til skoðunar hjá Akranesstofu og verða rædd á næstu vikum.  Hins vegar er ljóst að bæjaryfirvöld hafa áhuga á að þoka verkinu áfram enda um spennandi verkefni að ræða sem felur í sér mörg tækifæri fyrir Akranes. Ástand og horfur í  efnahagsmálum þjóðarinnar koma þó til með að tefja uppbygginguna eitthvað frá því sem áætlað hafði verið þó áfram verði unnið að þróun þess."

Þetta er meðal þess sem fram kemur í pistli Gunnars Sigurðssonar, forseta bæjarstjórnar Akraness hér á vef Akraneskaupstaðar í dag. Smelltu hér til að lesa allan pistilinn.

15. janúar 2009

Nýtt stjórnskipulag

- leiðir til bættrar þjónustu og skilvirkari vinnubragða -

Ég vil byrja á að óska Skagamönnum og landsmönnum öllum gleðilegs nýs árs og þakka þeim fyrir ánægjuleg samskipti og gott samstarf á liðnum árum. Nú um áramótin tók gildi nýtt og breytt stjórnskipulag hjá Akraneskaupstað en unnið hefur verið að þessum breytingum um nokkurra mánaða skeið. Í sumarbyrjun 2008 ákváðu bæjaryfirvöld á Akranesi að ráðast í slíka endurskoðun og var skipaður sérstakur stýrihópur sem hafði yfirumsjón með verkefninu.

Ástæður þess að ráðist var í þetta verkefni voru þær helstar að kominn var tími á endurskoðun þess skipulags sem Akraneskaupstaður starfaði eftir enda er ákvæði í málefnasamingi meirihlutans um að endurskoða skipurit bæjarins. Einnig hefur meirihlutinn lagt áherslu á að starfsemi Akraneskaupstaðar verði á einum stað.  Hið eldra skipulag þótti ekki endurspegla nógu vel þær breytingar sem orðið höfðu á starfsemi og starfsumhverfi bæjarins, ekki síst í ljósi þess hve bærinn hefur vaxið ört á undanförnum árum með sífellt umfangsmeiri og krefjandi verkefnum. Í ört vaxandi bæjarfélagi  er mikilvægt að stjórnsýsla sé sveigjanleg og taki mið m.a. af þörfum bæjarbúa og atvinnulífs. Hún þarf að vera gegnsæ og sveigjanleg og geta þannig mótast með þeim breytingum sem verða á hverjum tíma. Segja má að þessi sýn hafi verið höfð að leiðarljósi við þessa endurskipulagningu.

Að mati bæjaryfirvalda þurfti að ráðast í þessar breytingar á stjórnkerfi bæjarins til að geta mætt þessum þörfum. Breytingarnar eru þær helstar  að stofnuð verða tvö ný ráð sem starfa með bæjarráði að yfirstjórn bæjarins; fjölskylduráð og framkvæmdaráð og eiga allir kjörnir bæjarfulltrúar þannig aðild að ráðum og stjórnun bæjarins með setu í ráðunum. Þannig má um leið efla stefnumarkandi hlutverk kjörinna bæjarfulltrúa og gera aðkomu þeirra að stjórnun bæjarins og mótun starfsins sýnilegri, skýrari og um leið beinni en áður var. Undir hverju ráði um sig eru síðan stofnaðar stofur sem annast stjórnun og framkvæmd þeirra verkefna sem ráðin marka. Þannig fer Fjölskyldustofa með fræðslu- og uppeldismál, málefni félagsþjónustu, æskulýðs- og íþróttamál, forvarnir, öldrunarmál og málefni fatlaðra, þ.e. þá málaflokka sem áður tilheyrðu fjölskyldusviði og fræðslu-, íþrótta- og tómstundasviði. Framkvæmdastofa fer með yfirumsjón allra framkvæmda á vegum bæjarins auk reksturs fasteigna og umsýslu annarra eigna bæjarfélagsins.

Stofnað verður til Skipulags- og umhverfisstofu þar sem skipulags- og byggingamál, samgöngu- og umferðarmál og umhverfismál verða fyrirferðarmestu málaflokkar en segja má að með stofnun þessarar stofu sé verið að bregðast við síaukinni áherslu á þessa málaflokka í starfsemi og rekstri sveitarfélaga, og undirstrika um leið mikilvægi þeirra í stjórnun og starfsemi Akraneskaupstaðar.

Áður hafði verið stofnað til Akranesstofu sem fer með málefni safna og menningarmál, kynningar- og auglýsingamál, skipulag viðburða og málefni er tengjast ferðaþjónustu, þ.m.t. upplýsingamiðstöð og tjaldsvæði.

Þessar stofur tvær heyra beint undir bæjarstjóra í hinu nýja skipulagi, auk aðalskrifstofu þar sem farið er með fjármál, starfsmannamál og upplýsingakerfi bæjarins auk þess sem stofnað verður sérstakt þjónustuver sem ætlað er að auðvelda fólki aðgang að upplýsingum, þjónustu og stjórnsýslu bæjarins á einum stað.  Þannig getur fólk leitað til þjónustuversins, fengið ráðgjöf og úrlausn sinna mála eða leiðbeiningar um hvert það á að leita með erindi sín. Þjónustuverið verður staðsett á fyrstu hæð, þar sem nú er starfsemi Landsbankans.

Með þessu nýja skipulagi verða umtalsverðar breytingar á húsnæðismálum bæjarins en á næstu vikum flyst öll starfsemi og þjónusta Akraneskaupstaðar á einn stað að Stillholti 16-18. Þjónustuver verður opnað á jarðhæð en þar munu íbúar á Akranesi og aðrir sem eiga erindi við Akraneskaupstað geta nálgast upplýsingar, eyðublöð og margvíslega þjónustu.

Það er von mín að þessar breytingar búi starfsfólk og stjórnendur Akraneskaupstaðar betur undir þá krefjandi tíma sem fram undan eru, auki þjónustu bæjarins við fólkið sem í bænum býr og auðveldi því aðgang að stjórnsýslu og starfsfólki Akraneskaupstaðar.

Gunnar Sigurðsson,

forseti bæjarstjórnar Akraness