Akraneskaupstaður hlýtur jafnlaunavottun
Akraneskaupstaður fékk staðfestingu á veitingu jafnlaunavottunnar þann 2. mars 2021 frá Versa vottun ehf. Jafnlaunakerfi hefur verið innleitt í alla starfsemi Akraneskaupstaðar en það er stjórnunarkerfi sem tryggir að málsmeðferð og ákvörðun í launamálum byggist á málefnalegum sjónarmiðum og feli ekki í sér kynbundna mismunum.
Versa vottun hefur heimild samkvæmt (2.) breytingu á reglugerð nr. 1030/2017 um vottun á jafnlaunakerfum fyrirtækja og stofnana á grundvelli staðalsins ÍST 85, til að staðfesta með úttekt sinni að jafnlaunakerfi Akraneskaupstaðar uppfylli kröfur jafnlaunastaðalsins IST 85. Versa vottun er enn í faggildingarferli en hefur lokið svokölluðu skrifstofumati og einungis á eftir að ljúka svokölluðu vitnismati (e. witness assessment), þar sem matsaðili frá faggildingarsviði situr úttekt hjá Versa vottun og fylgist með framkvæmdinni. Jafnlaunastaðallinn tryggir fagleg vinnubrögð og fyrirbyggir beina og óbeina mismunum vegna kyns sem nýtist öllum stofnunum og fyrirtækjum. Jafnréttisstofa hefur veitt Akraneskaupstað heimild til að nota jafnlaunamerkið sem er birt á heimasíðu Akraneskaupstaðar.
