Sorphirða og endurvinnsla
MEÐHÖNDLUN ÚRGANGS
Umhverfisvernd og ábyrgð í umgengni um náttúruna eru mikilvæg atriði sem varða okkur í nútíð og framtíð. Flokkun sorps og rétt meðhöndlun þess er stór þáttur í að tryggja lífskjör til frambúðar. Sveitarfélagið sér um sorphirðu frá heimilum og rekur grenndarstöðvar og móttökustöðina Gámu fyrir heimili á Akranesi. Atvinnurekstur og stofnanir sjá um söfnun og ráðstöfun síns úrgangs.
Upplýsingar um staðsetningu á þjónustu varðandi úrgangsmál er að finna í Kortasjá Akraness undir Þjónusta og svo velja Grenndargámar.
Breyting í flokkun á úrgangi frá heimilum
Upplýsingar eru á annarri síðu sjá hér
Þjónustuaðili
Þjónustuaðili okkar í úrgangsmálum, Terra kennir sig við umhverfisþjónustu. Þeir sjá um almenna sorphirðu frá heimilum, þjónustuna á grenndarstöðvum og alla þjónustu á móttökustöðinni Gámu í Höfðaseli. Nýr samningur var gerður við Terra á árinu 2024 eftir útboð.
Tímasetningar á hirðu frá heimilum má sjá hjá Terru.
Móttökustöðin Gáma
Terra sér um rekstur endurvinnslustöðvar Gámu að Höfðaseli 16. Fasteignaeigendur eru minntir á klippikort sem fást afhent í þjónustuveri kaupstaðarins. Hver íbúðareigandi getur fengið afhent eitt kort árlega sem veitir handhafanum rétt til endurgjaldslausrar afhendingar á allt að 3 m3 af heimilisúrgangi í Gámu. Í Gámu er tekið á móti fjölda úrgangsflokka, og eru notendur hvattir til að flokka úrganginn heima hjá sér áður en þeir skila honum í rétta gáma á stöðinni.
Opnunartími Gámu er alla virka daga frá kl. 10-12 og 13-18 og á laugardögum frá kl. 10-14.
Söfnun nytjahluta fyrir nytjamarkaðinn Búkollu er í gámi sem merktur er starfseminni. Íbúum býðst að setja endurnýtanleg húsgögn og annað nýtilegt frá heimilinu i þann gám.
Sorpílát
Við öll heimili eiga að vera ílát fyrir 2 úrgangsflokka, til endurvinnslu og blandaðan úrgang. Innifalið í árlegu sorpgjaldi eru 2 stk 240 ltr ílát fyrir hvert heimili eða sambærilegt fyrir hverja íbúð í fjölbýli. Afgreiðsla sorpíláta fer fram í gegnum þjónustuver Akraneskaupstaðar, hvort sem verið er að fá ílát í fyrsta skipti, bæta við íláti eða endurnýja þau. Senda skal inn umsókn með rafrænum hætti á meðfylgjandi eyðublað.
Grenndarstöðvar
Á nokkrum stöðum í bæjarfélaginu hefur verið komið upp gámum fyrir úrgang til að auka þjónustu varðandi flokkun frá heimilum. Þar eru 4 gámar með litlum innmötunargötum fyrir glerumbúðir og annað hreint gler, málmumbúðir og aðrar hreina málma, pappír og pappa og plastumbúðir og annað plast. Í dag eru þessar grenndarstöðvar staðsettar á bakvið Bíóhöllina, Vesturgötu, bakvið Bókasafnið, Dalbraut og á safnasvæði Byggðasafnsins á Garðaholti.
Flöskur og dósir
Í Fjöliðjunni á Akranesi er boðið er upp á verndaða vinnu og endurhæfingu fyrir þá sem þess þurfa og leita eftir þjónustu. Á hverju ári tekur starfsfólk Fjöliðjunnar á móti, flokkar og telur á þriðju milljón umbúða. Þetta eru umbúðir með skilagjaldi, þ.e. áldósir, plastflöskur og glerflöskur frá almenningi og greiðir út skilagjald fyrir þær. Móttökustöð Fjöliðjunnar er staðsett á Smiðjuvöllum 9 og er hún opin alla virka daga frá kl. 9:00-11:45 og frá kl: 13:00-15:30.
Fatnaður
Á Smiðjuvöllum 9 eru staðsettir 2 móttökugámar á vegum Rauða Krossins fyrir fatnað og annan vefnað. Starfsfólk Fjöliðjunnar sér um að meðhöndla fatnaðinn, flokka og koma honum í áframhaldandi nýtingu í samstarfi við Rauða Krossinn.
Búkolla
Nytjamarkaðurinn Búkolla hefur verið starfandi á Akranesi síðan árið 2009. Starfsemi Búkollu felst í endurnýtingu fatnaðar og alls þess sem að heimilishaldi lýtur. Akurnesingar hugsa hlýlega til Búkollu þegar þeir losa sig við fatnað, húsgögn eða annan húsbúnað sem öðlast nýtt líf á öðrum heimilum. Í Búkollu býðst fólki á örorku og endurhæfingu störf.
Búkolla er staðsett á Smiðjuvöllum 9 og er markaðurinn opinn fimmtudaga til laugardaga kl. 12-15. Vörumóttaka er þriðjudaga til föstudaga kl. 10-15 og laugardaga kl. 12-15. Einnig er vörumóttaka á móttökustöð Gámu í Höfðaseli á opnunartíma Gámu.
Förgun bifreiða
Íbúar Akraness geta núna komið skilað ökutækjum sínum til förgunar í Gámu. Ökutækið skal vera á dekkjum og má ekki leka olíu eða öðrum vökvum.
Fylla skal út umsókn um afskráningu. Sjá leiðbeiningar á https://island.is/skilavottord.
Þú skráir þig inn með rafrænum skilríkjum og velur svo það ökutæki sem á að farga. Þegar þú hefur staðfest valið og sent inn umsóknina, þá ferðu með ökutækið á móttökustöð. Að því loknu og þegar ökutækið hefur verið afskráð færðu greitt skilagjald.
_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
Eldri fréttir í tengslum við sorphirðu og endurvinnslu
