Skóla- og frístundaráð

Í undirbúningi er könnun meðal foreldra leikskólabarna. Spurningalisti hefur verið sendur leikskólastjórum og Skagaforeldrum til yfirlestrar og beðið hefur verið um ábendingar og tillögu að nýjum spurningum.

Á fundum leikskólastjóra og einnig á fundum í fjölskylduráðinu hefur verið fjallað um nauðsyn þess að fleiri leikskólar en Vallarsel bjóði þjónustu frá 6:45. Tillaga sviðsstjóra er að Akrasel bjóði frá 1. ágúst upp á sambærilega þjónustu. Þannig fá foreldrar meira val og einnig minnkar álag í Vallarseli. Reikna má með að vaxandi þörf verði fyrir þessa þjónustu ef fjöldi vaktavinnustarfa eykst og fjölgun verður á Akranesi en auk vaktavinnufólks er þessi þjónusta nýtt af þeim sem sækja atvinnu eða skóla t.d. á höfuðborgarsvæðinu. Áætlaður viðbótarkostnaður af þessum sökum er kr. 670.000 vegna ársins 2015.

Skagaforeldrar buðu fulltrúum í skóla- og frístundaráði til samráðsfundar sem haldinn var í Þorpinu í febrúar. Foreldrar kynntu óskir sínar varðandi þjónustu leikskóla yfir sumarmánuðina. Fram kom á fundinum að fyrirkomulag verður með sama hætti sumarið 2015 og verið hefur undanfarin þrjú sumur. Áhersla verður lögð á að kynna "Sumarskólann" vel fyrir foreldrum og mun sú kynning fara fram í mars.

Á síðasta hausti var lögð fram ósk frá skólastjórnendum um hálfan skipulagsdag til viðbótar þeim fjórum sem nú eru til sameiginlegrar fræðslu og skipulags. Erindinu var hafnað en í umræðum kom fram að skilningur er á að nauðsynlegt sé að skapa svigrúm fyrir starfsfólk á skóla- og frístundasviði að hafa samráðstíma. Til þess að auka svigrúm til þess er lögð fram tillaga um aukin fjármagn til starfsmannafunda samtals kr. 639.000 svo bæta megi einum starfsmannafundi við þá sem fyrir eru.

Skóladagatal vegna skólaársins 2015-2016 var lagt fram til kynningar á fundi skóla- og frístundaráðs 3. febrúar sl. Ekki var búið að leggja þá tillögu fyrir skólaráð og nemendaráð. Nú hefur það samráðsferli átt sér stað og því er skóladagatal 2015 -2016 lagt fyrir skóla- og frístundaráð til staðfestingar.

Að undanförnu hefur staðið yfir undirbúningur að afreksíþróttasviði sem nemendur í FVA geta skráð sig á frá og með haustinu 2015 ef allt gengur samkvæmt áætlun. Um er að ræða allt að sex íþróttagreinar sem verða í boði. ÍA og aðildarfélög vinna náið saman með FVA að undirbúningi. Verið er að skoða hvort og hvernig hægt verður að koma æfingartíma að í mjög svo ásetnum íþróttamannvirkjum.

Menntamálaráðuneytið kynnir í bréfi dagsettu 24. febrúar 2015 breytingar á reglugerð sem fela í sér skýrari starfsemislýsingu á sérdeildum.

Fundarmenn höfðu fengið upplýsingar um kostnað sem búið er að bókafæra á skóla- og frístundasviði vegna janúar 2015.

Í fjárhagsáætlun fyrir íþróttamannvirki er ekki gert ráð fyrir starfsmannafundum né fræðslu. Forstöðumaður hefur gert áætlun um fjóra starfsmannafundi á árinu 2015 og er viðbótarkostnaður tæplega hálf milljón.

Þorpið sendi inn tillögu að gjaldskrá fyrir verkefnið Gaman saman á seinni hluta síðasta árs. Gjaldskrárnefnd afgreiddi ekki tillöguna og því er tillaga deildarstjóra lögð fyrir fund skóla- og frístundaráðs til afgreiðslu.