Sigurður Arnar ráðinn skólastjóri Grundaskóla
Bæjarstjórn Akraness samþykkti á fundi sínum í gær, þann 5. apríl, að ráða Sigurð Arnar Sigurðsson í stöðu skólastjóra Grundaskóla.
Sigurður Arnar hefur starfað í Grundaskóla í 24 ár og verið aðstoðarskólastjóri frá árinu 2006. Hann er með meistaragráðu í stjórnun menntastofnana frá Háskóla Íslands frá árinu 2013 og diplóma í stjórnun og forystu frá Háskólanum í Reykjavík frá árinu 2008 og frá Háskóla Íslands frá árinu 2006 auk B.Ed. gráðu frá Kennaraháskólanum frá árinu 1992. Hann hefur einnig réttindi sem héraðsmatsmaður í skólum tengt ytra gæðamati menntamálayfirvalda frá árinu 2014. Sigurður hefur verið virkur í félagsmálum, meðal annars í stjórn skólastjórafélags Íslands og var kjörinn formaður ÍA, Íþróttabandalags Akraness árið 2014. Staða skólastjóra Grundaskóla á Akranesi var auglýst laus til umsóknar þann 13. febrúar síðastliðinn. Skóla- og frístundaráð fól Regínu Ásvaldsdóttur, bæjarstjóra, að hafa umsjón með ráðningarferlinu fyrir hönd Akraneskaupstaðar og fékk hún ráðgjafarfyrirtækið Capacent til liðs við sig í þeim efnum.
Alls bárust sex umsóknir um starfið og einn umsækjandi dró umsókn sína til baka.
