Bæjarstjórn

Forseti býður fundarmenn velkomna.
Forseti minnist látins bæjarfulltrúa, Guðbjarts Hannessonar.
Guðbjartur Hannesson alþingismaður lést föstudaginn 23. október s.l. 65 ára að aldri.
Guðbjartur fæddist á Akranesi 3. júní 1950 og ólst hér upp. Foreldrar hans voru Rannveig Jóhannesdóttir, húsmóðir og Hannes Þjóðbjörnsson, verkamaður.
Hann lauk kennaraprófi frá Kennaraskóla Íslands, tómstundakennaraprófi frá Seminariet for Fritidspædagoger, Vanløse í Danmörku, stundaði framhaldsnám í skólastjórn við Kennaraháskóla Íslands og og lauk meistaraprófi frá Institute of Education, University College of London.
Skátastarfið var alltaf eitt af hans áhugamálum og var hann erindreki fyrir Bandalag íslenskra skáta árin 1973 til 1975.
Guðbjartur starfaði lengi að skólamálum og voru þau honum mjög hugleikin. Hann var kennari við Barnaskóla Akraness 1971 til 1973 og 1979 til 1981 og við Peder Lykke Skolen í Kaupmannahöfn 1978 til 1979. Árið 1981 var hann ráðinn fyrsti skólastjóri Grundaskóla á Akranesi og gegndi því starfi allt til ársins 2007.
Hann var mikill Skagamaður og vildi veg sinnar heimabyggðar sem mestan. Hann sat í bæjarstjórn Akraness á árunum 1986 til 1998 og var formaður bæjarráðs og forseti bæjarstjórnar hluta af þeim tíma. Á vettvangi sveitarstjórnarmála gegndi hann einnig fjölda trúnaðarstarfa.
Guðbjartur var kjörinn á Alþingi árið 2007. Hann var forseti Alþingis árið 2009, félags- og tryggingamálaráðherra og heilbrigðisráðherra árið 2010, velferðarráðherra árin 2011 til 2013 auk þess sem han sat í eða veitti formennsku fjölmörgum nefndum á vegum Alþingis.
Eftirlifandi eiginkona Guðbjarts er Sigrún Ásmundsdóttir. Dætur þeirra eru Birna og Hanna María.
Fundarmenn risu úr sætum og vottuðu hinum látna virðingu sína.