Fjölskylduráð (2009-2014)

Helga Gunnarsdóttir framkvæmdastjóri Fjölskyldustofu og Sveinborg Kristjánsdóttir félagsmálastjóri funduðu með dagforeldrum á Akranesi um samstarf, umsjón og eftirlit. Sveinborg gerði grein fyrir umræðum á fundinum. Ákveðið var að þrír dagforeldrar ásamt daggæslufulltrúa myndi samráðshóp.

Niðurstöður frá fundi með foreldrum fatlaðra barna á Akranesi og í Hvalfjarðarsveit sem haldinn var 25. apríl 2012 á Akranesi, voru kynntar. Á fundinum var farið yfir tilfærslu þjónustu málefna fatlaðra til sveitarfélagsins og m.a. farið yfir hvernig til hefur tekist, hvað þarf sveitarfélagið að leggja áherslu á í framtíðinni í þjónustu við fatlaða. Fjölskyldustofa stefnir að því að halda samkonar fundi reglulega með foreldrum.

Bréf frá Velferðarvaktinni var lagt fram. En þar kemur m.a. fram að velferðarvaktin "...vill vekja athygli á því að rannsóknir hafa sýnt fram á að afleiðingar efnahagskreppu koma oft fram hjá börnum eftir þrjú til fimm ár. Hvetur því velferðarvaktin sveitarstjórnir og skólanefndir til að huga sérstaklega að líðan barna í upphafi skólaárs."

Heiðrún Janusardóttir verkefnisstjóri æskulýðs- og forvarnarmála mætti á fundinn kl. 17:15. Heiðrún fór yfir fundargerðir starfshóps um íþrótta- og æskulýðsmál veturinn 2011-2012. Fjölskylduráð mun fara yfir tillögur starfshópsins.