Skóla- og frístundaráð

Næsti fundur skóla- og frístundaráðs verður haldinn miðvikudaginn 7. ágúst 2024.

Skóla- og frístundaráð þakkar Valdísi Eyjólfsdóttur verkefnastjóra fyrir yfirferð á fundargerðum starfshópsins.

Skóla- og frístundaráð þakkar starfsfólki Tónlistarskólans fyrir erindið og Rut Berg og Elfu Margréti fyrir samtalið. Ráðið leggur ríka áherslu á að gripið verði til nauðsynlegra aðgerða til að koma loftræsingu og hitastýringu hússins í lag og vísar þeim hluta erindisins til umfjöllunar í skipulags- og umhverfisráð. Ráðið tekur jafnframt undir ábendingar starfsfólks um nauðsyn þess að unnin verði áætlun um endurnýjun hljóðfæra skólans sem mörg hver eru komin til ára sinna. Hvað varðar ósk um kaup á 15-20 spjaldtölvum, sem ætlaðar eru m.a. í tónfræðikennslu, þemaverkefni og námskeiðshald, leggur skóla- og frístundaráð til að hún verði tekin upp aftur við gerð fjárhagsáætlunar fyrir árið 2025.

Skóla- og frístundaráð þakkar Rut og Elfu fyrir upplýsandi samtal. Fram kom í kynningu þeirra að nemendur skólans eru um 350 talsins. Óvenju margir eru á biðlista fyrir komandi skólaár og hefur þurft að stýra nemendum úr forskóla II í hálft nám, í stað heils náms, til að koma fleirum inn í skólann. Stöðugildafjöldi hefur verið óbreyttur frá árinu 2008, eða 14,9. Áhugi er hjá stjórnendum skólans að þróa ýmsar nýjungar s.s. námskeið og söngleikjadeild. Tónlistarskólinn hefur lagt áherslu á skapandi nám í bland við hefðbundið og heppnuðustu tónleikarnir TOSKA fríkar út einstaklega vel. Skóla- og frístundaráð vill færa starfsfólki og nemendum skólans sérstakt hrós og þakkir fyrir þann frábæra viðburð.

Vilji skóla- og frístundaráðs stendur til að útboðsleið, á rekstri og þjónustu mötuneyta grunnskólanna, verði skoðuð af fullri alvöru. Er það mat ráðsins að sú leið geti verið ákjósanleg til þess m.a. að mæta áskorunum við gjaldfrjálsar skólamáltíðir, auka gæði, fjölbreytni og val skólamáltíða ásamt því að skapa tækifæri til samlegðar með öðrum stofnunum/rekstrareiningum kaupstaðarins. Til þess að hefja vinnu við undirbúning og gerð útboðsgagna leggur skóla- og frístundaráð til við bæjarráð að veitt verði heimild til að óska eftir tilboðum í aðkeypta ráðgjafavinnu í tengslum við verkefnið.

Skóla- og frístundaráð þakkar Ívari Orra fyrir erindi sitt um framtíðarsýn frístundaheimila Akraneskaupstaðar. Ráðið felur skóla- og frístundasviði að vinna málið áfram í samstarfi við fjármálsvið.

Skóla- og frístundaráð þakkar Guðmundu og Heiðrúnu fyrir gagnlegt samtal um tómstundaframlag og íþróttagrunn fyrir yngstu börn grunnskólanna. Ráðið felur sviðsstjóra að taka saman skýrslu úr fyrirliggjandi gögnum um endurskoðun á upphæð og fyrirkomulagi tómstundaframlaga sem tekin verður fyrir á fyrri fundi ráðsins í september.
Skóla- og frístundaráð telur verkefni ÍA - íþróttagrunnur, spennandi tilraunarverkefni og er áfram um að það komist til framkvæmnda. Skóla- og frístundaráð felur sviðsstjóra og verkefnastjórum á sviðinu að vinna málið áfram með frístundaheimilunum og íþróttabandalaginu. Ráðið óskar eftir kynningu á loka tillögum/fyrirkomulagi verkefnisins og kostnaðargreiningu ásamt því að skuldbinding aðildarfélaga ÍA til þátttöku í verkefninu liggi fyrir í haust.

Skóla- og frístundaráð þakkar Önnu Maríu verkefnastjóra fyrir yfirferðina á stöðu nýbyggingar á Jaðarsbökkum.

Skóla- og frístundaráð þakkar Daníel Sigurðssyni forstöðumanni íþróttamannvirkja fyrir kynningu á tilboðum í búnaðarkaup fyrir íþróttahúsið á Vesturgötu og nýja íþróttahúsið á Jaðarsbökkum. Fengin voru tilboð frá þremur fyrirtækjum og var Altís með hagstæðustu verðin. Veittur er viðbótar afsláttur ef heildarpakkinn fyrir bæði húsin er tekinn hjá fyrirtækinu. Skóla- og frístundaráð leggur til við bæjarráð að forstöðumaður íþróttamannvirkja fái heimild til að kaupa nauðsynlegan búnað skv. fyrirliggjandi lista fyrir íþróttahúsið á Vesturgötu svo hægt verði að hefja starfsemi með fullbúið hús í haust.