Velferðar- og mannréttindaráð

Farið yfir uppsetningu og verkferla tengda verkefnaskrá, ásamt drögum að aðgerðaáætlun fyrir heildarstefnuna.

Húsnæðisáætlun 2025 til kynningar.

Við yfirstandandi innleiðingu sveitarfélaga á samþættri heimaþjónustu í þágu eldra fólks (Gott að eldast) kom fram mikilvægi þess að reglur sveitarfélaga um stuðningsþjónustu væru samræmdar.



Markmið breytinganna er að þjónusta sveitarfélaga við eldra fólk efli það til sjálfsstæðis og ábyrgð þess á eigin öldrun. Stuðningsþjónustu er ætlað að aðstoða og hæfa notendur sem aðstæðna sinna vegna þurfa stuðning við athafnir daglegs lífs og/eða styðja til virkni og félagslegrar þátttöku.



Var því stofnaður hópur með aðilum frá verkefnastjórn Gott að eldast, Sambandi íslenskra sveitarfélaga og stjórnendum í sveitarfélögum sem tóku að sér að vinna drög að samræmdum reglum.



Eru þau drög lögð fram til kynningar og umræðu.

Í lok árs 2023 var gengið frá styrksamkomulagi um ráðningu tengiráðgjafa í 12 mánuði milli félags- og vinnumarkaðsráðuneytisins og Akraneskaupstaðar, vegna þátttöku Vesturlands í tilraunaverkefnum um samþættingu skv. aðgerðaáætlun Gott að eldast.



Var ráðningasamningur gerður við Laufeyju Jónsdóttur um að sinna starfi tengiráðgjafa fyrir allt Vesturland 1. mars 2024-28.febrúar 2025.



Var greinargerð send á ráðuneytið í nóvember um stöðu verkefnis, nýtingu fjármuna vegna þess, mat á árangri og mikilvægi framhalds á starfi tengiráðgjafa 2025-2026.



Hefur félags- og vinnumarkaðsráðuneytið sent samkomulag um styrk vegna áframhaldandi starfs tengiráðgjafa fyrir Vesturland. Ekki er gert ráð fyrir breytingum á fjárhæðum.



Er samkomulagið lagt fram til samþykktar í velferðar- og mannréttindaráði.

Bifreiðamál stuðnings- og stoðþjónustu. Núverandi bíll er í slæmu ástandi, lekur olíu ofl. skv. starfsmanni áhaldahúss sem sinnt hefur viðhaldi bílsins. Lagt er til að núverandi bifreið verði seld og annar bíll tekinn á langtímaleigu. Fyrir liggja tilboð frá þremur bílaleigum sem eru aðilar að rammasamningi ríkisins.

Á fundi með Sambandi íslenskra sveitarfélaga 8. nóvember sl. var sveitarfélögum tilkynnt um að félags- og vinnumarkaðsráðuneytið hefði horfið frá áætlunum um endurskoðun samnings um móttöku flóttafólks og hygðist bjóða sveitarfélögum upp á undirritun óbreytts samnings til eins árs, vegna ársins 2025.



Í kjölfar slita ríkisstjórnarsamstarfsins var starfshópi, sem vann að endurskoðun samningsins, þakkað fyrir sín störf. Barst tölvupóstur frá ráðuneytinu sem staðfestir þá tilætlan og því talið nauðsynlegt að bíða með tillögur starfshópsins að breytingum á samningnum þar til ný ríkisstjórn hefur tekið til starfa.



Fjöldi athugasemda voru gerðar við þessar fyrirætlanir ráðuneytisins og miklum vonbrigðum lýst yfir af hálfu sveitarfélaganna. Þá var upplýst um að einhver sveitarfélög íhuga að draga sig út úr samningi um móttöku flóttafólks. Þau sveitarfélög sem sjá ekki annað fært en að ganga til áframhaldandi samninga, velta því þó upp hvaða þýðingu það hafi fyrir þau sveitarfélög sem eftir standa og hvort ekki komi til álita að úthluta auknu fjármagni til þeirra. Einnig var sett fram sú krafa sveitarfélaganna að inn í gildandi samninga verði sett ákvæði um að Vinnumálastofnun greiði fyrir paranir við sveitarfélögin sem eru umfram þann fjölda sem tiltekinn er í samningi við viðkomandi sveitarfélag. Verið er að skoða hvernig unnt er að bregðast við þessari beiðni sveitarfélaganna samhliða vinnslu viðauka samnings vegna 2025.



Í fylgiskjölum má einnig sjá viðbrögð Ástu Margrétar Sigurðardóttur lögfræðings hjá félags- og vinnumarkaðsráðuneyti, við bókun bæjarráðs um framlengingu á samningi vegna móttöku flóttafólks á Akranesi út árið 2024. Fellst ráðuneytið ekki á þá fyrirvara og skilyrði sem bæjarráð Akraneskaupstaðar tiltók í bókun 12. september sl.



Er viðauki, vegna samnings um mótttöku flóttafólks árið 2024 því lagður fram að nýju, en nauðsynlegt er að taka skýra afstöðu til þess hvort sveitarfélagið riti undir þann samning.



Í tölvupósti frá félags- og vinnumarkaðsráðunteytinu 14. nóvember sl. Er óskað eftir að sveitarfélagið hafi samband við ráðuneytið um hvort vilji sé til þess að framlengja samning um móttöku flóttafólks frá næstu áramótum og út árið 2025.



Hér er því bæði verið að óska eftir bókun ráðsins um framlengdan samning 2024 sem og afstöðu til óbreytts samnings vegna ársins 2025.

Fundað hefur verið með aðila hjá fyrirtækinu Consensa vegna hugsanlegrar aðkomu þeirra að útboði akstursþjónustu Akraneskaupstaðar. Áætlaður tími í verkefnið eru á bilinu 50 - 60 klst, eða allt að kr. 1.374.000, fyrir utan vask, sem fæst endurgreiddur.



Til skoðunar er að bjóða út akstur á heimsendum mat sér, þar sem ólíkar kröfur gilda um bifreiðir sem sinna slíkum akstri.



Óskað er eftir afstöðu velferðar- og mannréttindaráðs til tilboðs Consensa.