Fylgigögn með fundargerðum
Akraneskaupstaður hefur tekið upp þá vinnureglu að birta fylgiskjöl með fundargerðum ráða og nefnda kaupstaðarins. Þessi ákvörðun er tekin með það að markmiði að bæta upplýsingagjöf til almennings. Fyrst um sinn munu fylgiskjöl birtast með fundargerðum bæjarstjórnar og bæjarráðs. Að sögn Regínu Ásvaldsdóttur bæjarstjóra þá er ekki algengt að sveitarfélög birti fundargerðir með þessum hætti en hún hefur þá trú að þeim fari fjölgandi. ,,Hafnarfjarðarbær og Árborg birta fylgiskjöl með fundargerðum en ég hef ekki upplýsingar um fleiri“. Birting fylgiskjala gerir ríkari kröfur til frágangs mála, bæði af hendi sveitarfélagsins en einnig þeirra sem senda inn erindi. ,,Við förum vandlega yfir málin og metum hvað á að birta og hvað ekki en við þurfum líka að gæta að persónuvernd og virða samkeppnisstöðu t.d. fyrirtækja“ segir Regína.
