Írskir vetrardagar hefjast á morgun
Írskir vetrardagar verða haldnir 14.-18. mars og er það í þriðja sinn sem þeir eru haldnir. Á árinu 2015 ákvað Menningar- og safnanefnd kaupstaðarins að koma fram með þessa nýjung í menningarlífi Akraness. Markmiðið er að tengjast Írlandi enn frekar, meðal annars í gegnum menningu, bókmenntir og tónlist. Hátíðin hefst á kvöldstund með Elly og Margréti Blöndal í Stúkuhúsinu miðvikudagskvöldið kl. 20 og á sama tíma stíga nemendur FVA og tónlistarskólans á stokk í Bíóhöllinni með Slá í gegn. Meðal þess sem er á boðstólnum í ár er fyrirlestur Sólveigar Jónsdóttur, Frændur eða fjendur? en þar ber hún saman sjálfstæðisbaráttu og þjóðernishyggju Íslands og Írlands. Í fyrstu virðast þjóðirnar tvær ekki eiga margt sameiginlegt í þessum efnum en þjóðirnar fetuðu þessa leið á svipuðum tíma og oftar en ekki voru stór skref stigin svo til samtímis á Íslandi og á Írlandi á leið til sjálfstæðis. Auk þessa verður á boðstólnum örnefnagöngutúr með starfsfólki Landmælinga, kvöldvökur á Gamla Kaupfélaginu, írsk fiskisúpa hjá Café Kaja, írskar bókmenntir í öndvegi á bókasafni og fleiri sýningar á Slá í gegn í bíóhöllinni.
Nánari upplýsingar eru í viðburðadagatali á heimasíðu Akraneskaupstaðar
