Bæjarstjórn

Forseti býður fundarmenn velkomna til fundar.

Benedikt Björn Jónmundsson
Minningarorð

Benedikt Björn Jónmundson fæddist þann 5. ágúst 1944 á Laugalandi í Fljótum en flutti með foreldrum sínum á Akranes 10 ára gamall og bjó hér og starfaði alla tíð síðan. Benedikt lauk iðnnámi frá iðnskóla Akraness og aflaði sér síðar meistararéttinda í málaraiðn. Hann starfaði sem málari, vann við bókhald hjá HB og Co en lengst af var hann útibússtjóri Skeljungs hf á Akranesi og starfaði þar í um 30 ár. Þá stofnaði hann ásamt fleirum fyrirtækið Þrjá málara og starfaði við iðn sína til starfsloka.

Benedikt var varabæjarfulltrúi fyrir hönd Sjálfstæðisflokksins kjörtímabilið 1982-86 en hlaut svo kjör sem bæjarfulltrúi í kosningum árið 1986 og sat í bæjarstjórn í tvö kjörtímabil, eða til ársins 1994. Sem bæjarfulltrúi sat hann meðal annars í náttúruverndarnefnd, jafnréttisráði, félagsmálaráði og hafnarnefnd Akraneskaupstaðar. Þá sat hann í bæjarráði á síðara kjörtímabili sínu sem bæjarfulltrúi og var þá jafnframt fulltrúi í stjórn Sjúkrahúss og heilsugæslustöðvar Akraness og í samstarfsnefnd um svæðisskipulag sunnan Skarðsheiðar. Þá sat hann í stjórn Dvalarheimilisins Höfða kjörtímabilið 1998-2002.

Benedikt lést á Heilbrigðisstofnun Vesturlands á Akranesi 2. janúar síðastliðinn. Fyrir hönd bæjarstjórnar færi ég eftirlifandi eiginkonu hans, Mattheu Kristínu Sturlaugsdóttur og dætrum þeirra, þeim Rannveigu og Valey, eiginmönnum þeirra og börnum, innilegar samúðarkveðjur.

Bæjarstjórn vottar Benedikt heitnum virðingu sína og þakklæti fyrir mikilsvert framlag til vaxtar og viðgangs samfélagsins hér á Akranesi.