Bæjarskrifstofa Akraneskaupstaðar er stofnun ársins 2020
Sameyki stéttarfélag tilkynnti sl. miðvikudag þann 14. október um val á Stofnun ársins árið 2020 í gegnum streymi en titlana Stofnun ársins og Fyrirmyndarstofnun hljóta þær stofnanir sem þykja skara fram úr að mati starfsmanna í könnun Sameykis stéttarfélags í almannaþjónustu.
Bæjarskrifstofur Akraneskaupstaðar hlutu þar útnefninguna Stofnun ársins - borg og bær 2020 í flokki minni stofnanir með 5 til 49 starfsmenn. „Síðustu tvö ár höfum við verið í öðru sæti og er afar ánægjulegt á þessum sérstöku tímum að landa fyrsta sætinu. Á skrifstofunni starfar metnaðarfullt fólk, sem er annt um vellíðan samstarfsmanna sinna og hefur sterkan vilja til að auka lífsgleði íbúa Akraness." segir Sævar Freyr Þráinsson bæjarstjóri um niðurstöðuna.
Könnunin náði til um 12 þúsund starfsmanna í opinberri þjónustu, bæði hjá ríki, Reykjavíkurborg, sveitarfélögunum og sjálfseignarstofnunum. Hún er unnin í samstarfi við Fjármála- og efnahagsráðuneyti og gefur mikilvægar upplýsingar um stöðu starfsmanna á vinnumarkaði. Í henni eru þátttakendur spurðir út í níu þætti í starfsumhverfinu þ.e. trúverðugleika stjórnenda, starfsanda, launakjör, vinnuskilyrði, sveigjanleika í starfi, sjálfstæði í starfi, ímynd stofnunar, ánægju og stolt og jafnrétti. Markmiðið með að velja fyrirmyndarstofnanir er að hvetja stjórnendur til að gera vel í starfsmannamálum og að auka umræðu um aðbúnað og líðan starfsmanna á vinnustöðum.
