Bæjarstjóri lýkur störfum í dag

Á myndinni má sjá bæjarstjórn Akraness eins og hún var skipuð í lok árs 2016 ásamt þeim Regínu og Steinari. Í fremri röð frá hægri eru Ólafur Adolfsson, Sigríður Indriðadóttir, Vilborg Þ. Guðbjartsdóttir, Ingibjörg Pálmadóttir, Rakel Óskarsdóttir, Regína og Valgarður L. Jónsson. Í aftari röð frá hægri eru Einar Brandsson, Steinar, Ingibjörg Valdimarsdóttir og Valdís Eyjólfsdóttir. Valdís er komin í leyfi í eitt ár og tók Þórður Guðjónsson hennar sæti um áramótin.

Regína Ásvaldsdóttir bæjarstjóri lýkur störfum fyrir Akraneskaupstað í dag, 3. mars en hún hefur verið ráðin sviðsstjóri Velferðarsviðs Reykjavíkurborgar og hefur störf  í næstu viku. Á fundi bæjarstjórnar þann 28. febrúar var lögð fram svohljóðandi bókun:

Bæjarstjórn Akraness óskar Regínu til hamingju með nýja starfið, óskar henni velfarnaðar í starfi og samþykkir samhljóða að starfslok verði 3. mars næstkomandi. Bæjarstjórn þakkar ennfremur Regínu fyrir afar ánægjulegt og árangursríkt samstarf undanfarin ár.

Steinar Adolfsson sviðsstjóri stjórnsýslu- og fjármálasviðs mun gegn starfi bæjarstjóra þar til nýr bæjarstjóri verður kynntur til sögunnar á næstunni.