Bakvarðasveit í velferðarþjónustu

Útbreiðsla Covid-19 getur orðið til þess að erfitt verði að manna þjónustu sem ekki má falla niður og skapað þannig álag á vissum starfstöðvum. Mikilvægt er að tryggja þjónustu og aðstoð við viðkvæmustu hópana og því ákváðu Félags- og barnamálaráðherra og Samband íslenskra sveitarfélaga að vinna í sameiningu að því að koma á fót bakvarðasveit í velferðarþjónustu.

Leitað er til starfsfólks í velferðarþjónustu sem og annarra áhugasamra aðila til að mynda bakvarðasveit til tímabundinnar aðstoðar í velferðarþjónustu út um allt land. Óskað er eftir liðsinni úr hópi almennra starfsmanna auk félagsliða, þroskaþjálfa, félagsráðgjafa, sjúkraliða, sálfræðinga og hjúkrunarfræðinga sem eru reiðubúin að koma tímabundið til starfa í velferðarþjónustunni með skömmum fyrirvara. Reynsla af störfum í velferðarþjónustu er kostur en ekki skilyrði.

Félagsmálaráðuneytið hefur útbúið rafrænt skráningarform í samvinnu við Samband íslenskra sveitarfélaga fyrir þá sem eru reiðubúnir að skrá sig í bakvarðasveitina. Fólki gefst kostur á að skrá sig í tímavinnu, hlutastarf eða fullt starf allt eftir því hvað hentar viðkomandi. Laun taka mið af kjarasamningi/stofnanasamningi viðkomandi stéttarfélags á þeirri starfstöð sem um ræðir hverju sinni.

Við viljum hvetja fólk sem hefur tök á að skrá sig í bakvarðasveitina og byggja upp bakverði um allt land.